"افغانستان باید د نړۍ د نورو هېوادونو په څېر د پولیو له ویروسه پاک شي"
بادغیس، افغانستان (۳۱ غویی ۱۴۰۳) – ۳۴ کلن محمد نعیم چې د واکسین بکس یې پر اوږه دی، د بادغیس ولایت په مرکز قلعه نو کې د یوه کور دروازه ټکوي او د کورنۍ له مشرانو غواړي چې خپل ماشومان د واکسین لپاره دباندې را وباسي.
څلور کاله کېږي چې هغه د واکسیناتور په توګه په قلعه نو ښار کې دنده مخ ته وړي.
دغه واکسیناتور د پولیو واکسین په هر کمپاین کې دنده لري چې د قلعه نو په درېیمه ناحیه کې کور په کور وګرځي او له پنځو کلونو د کم عمر ماشومان واکسین کړي.
د محمد نعیم په وینا، که له څه هم له تېرو دریو کلونو راهیسې په بادغیس کې د پولیو مثبته پېښه نه ده لیدل شوې اما د ده هڅه دا ده چې د پولیو ویروس د بیا خپرېدو مخنیوی وشي.
هغه چې په ښوونه او روزنه کې یې د لیسانس تر کچې زده کړې کړې، په افغانستان کې د پولیو ویروس له منځه وړل خپله لویه هیله ګڼي.
هغه وايي: «افغان ماشومان باید نور د پولیو ناروغۍ قرباني نه شي، افغانستان باید د نړۍ د نورو هېوادونو په څېر له پولیو ویروس څخه پاک شي.»
هغه چې د یوه ماشوم پلار هم دی، زیاتوي، هڅه کوي د هغه د مسوولیت په ساحه کې یو ماشوم هم له واکسین څخه پاتې نه شي او تل خپلو نورو همکارانو ته هم وايي چې په دې برخه کې جدي و اوسي او کوښښ وکړي چې ټول ماشومان واکسین شي.
۳۴ کلن محمد نعیم چې د واکسین بکس یې پر اوږه دی، د بادغیس ولایت په مرکز قلعه نو کې د یوه کور دروازه ټکوي او د کورنۍ له مشرانو غواړي چې خپل ماشومان د واکسین لپاره دباندې را وباسي
© له پولیو خلاص افغانستان | ۱۴۰۳ | مرضیه فروتن
د پولیو د دایمي له منځه وړلو هڅې
د محمد نعیم په وینا، د واکسیناتورانو د هڅو په پایله کې له تېرو دریو کلونو راهیسې په بادغیس ولایت کې د پولیو مثبت پېښه نه ده رامنځ ته شوې.
بادغیس د افغانستان په غرب کې له زیان منونکو ولایتونو دی چې شاوخوا څلور کاله مخکې د دغه ولایت په بالامرغاب ولسوالۍ کې د پولیو دوې پېښې ثبت شوې وې.
خو له تېرو دریو کلونو راهیسې دغلته د امنیت له ټینګښت سره د پولیو واکسین کمپاین د پوښښ ساحه پراخه شوې چې له امله یې د پولیو پېښې مهار شوې دي.
محمد نعیم وویل، په تېرو دریو کلونو کې په دغه ولایت کې د پولیو مثبې پېښې نه ثبتېدل د ده او ټولو واکسیناتورانو لپاره لویه لاسته راوړنه ده.
هغه زیاته کړه: «د پولیو ویروس مهارول د واکسیناتورانو او نورو روغتیايي کارکوونکو د هڅو او زحمتونو نتیجه ده.»
د دغه واکسیناتور په باور، تر اوسه هم په بادغیس کې د پولیو ویروس ګواښ شته، باید اجازه ور نه کړل شي چې ماشومان د دغه وژونکي ویروس په دام کې ونښلي.
محمد نعیم یوې ماشومې ته د پولیو واکسین ورکوي
© له پولیو خلاص افغانستان | ۱۴۰۳ | مرضیه فروتن
د کورنیو کلیدي رول
د محمد نعیم په خبره، په بادغیس کې د ماشومانو واکسینولو په برخه کې د کورنیو لېوالتیا او همکاري د پولیو ویروس د مهارولو اصلي لامل دی.
هغه وويل، د پولیو واکسین په کمپاینونو کې د ده د څلور کلن ماموريت په لړ کې ترڅ کې دا د کورنيو همکاري وه چې د قلعه نو ښار په درېيمه ناحيه کې هېڅ ماشوم له واکسين څخه نه دی پاتې شوی.
دی وايي: «که څه هم په بادغیس کې د ماشومانو واکسینولو ته د خلکو لېوالتیا ډېره ده خو بیا هم له کورنیو غوښتنه کوم چې د خپلو ماشومانو واکسینولو په برخه کې جدي و اوسي او پرېنږدي چې له واکسین څخه محروم شي.»
محمد نعیم زیاته کړه، آن که یو ماشوم هم له واکسین څخه پاتې شي نو د پولیو ناروغۍ له ګواښ سره مخ کېږي چې دغه ماشوم بیا نور ماشومان هم له ګواښ سره مخ کولای شي.
د ده په باور، که واکسیناتوران او کورنۍ په ګډه له پنځو کلونو د کم عمر ماشومانو د واکسینلو په پرخه کې خپل مسوولیت په سمه توګه ترسره کړي نو په افغانستان کې به د پولیو ویروس ژر له منځه لاړ شي.
له دایمي ګوزڼ څخه د ماشومانو ژغورل
د بادغیس د مرکز قلعه نور ښار اوسېدونکی ۲۷ کلن ادریس عمري چې د دوو ماشومانو پلار هم دی. خوشحاله دی چې په دغه ولایت کې د پولیو ویروس مهار شوی دی.
د هغه په خبره، د واکسیناتورانو او روغتیايي ډلو د هڅو په پایله کې له تېرو دریو کلونو راهیسې په بادغیس کې هیڅ ماشوم د پولیو په ناروغي نه دی اخته شوی.
هغه زیاته کړه: «د پولیو واکسین دوامدار کمپاین زموږ د ماشومانو د خوندیتوب لامل شوی دی، ډېر خوشحاله یم چې په هر کمپاین کې واکسیناتوران زما د کور تر دروازې راځي او ماشومان مې واکسینوي.»
د عمري په باور، کور په کور د واکسین کمپاین د خلکو لپاره لویه اسانتیا ده.
هغه وویل: «له خلکو مې غوښتنه دا ده چې له واکسیناتوارانو سره د ماشومانو د واکسینولو په برخه کې همکاري وکړي.»
روغتیايي چارواکي هم وايي چې له تېرو دریو کلونو راهیسې د بادغیس په ګډون په لوېدیځ زون کې د پولیو مثبته پېښه نه ده ثبت شوې او نه هم د پولیو ویروس مثبته چاپېریالي نمونه لیدل شوې ده.
مرضیه فروتن | بادغیس