د پولیو پرله پسې څلورمه پېښه هم په ننګرهار کې ثبت شوه
کابل، افغانستان (۱۱ غبرګولی ۱۴۰۲): په ننګرهار کې د پولیو یا ماشومانو د ګوزڼ بله پېښه ثبت شوې چې له دې سره په روان ۲۰۲۳ زېږدیز کال کې د هېواد په کچه د پولیو پېښو شمېر څلورو ته لوړ شو.
په دې اړه د عامې روغتیا وزارت د عامه اړیکو له دفتره په خپره شوې خبرپاڼه کې راغلي چې د پولیو دغه نوې پېښه د ننګرهار ولایت په بهسود ولسوالۍ کې ثبت شوې ده.
سرچینه زیاتوي، په دې ناروغي اخته ماشوم ۴۸ میاشتې عمر لري او د یادې شوې ولسوالۍ د سراچې غونډۍ اړوند د ثمرخېل کلي اوسېدونکی دی.
د خبرپاڼې په حواله، ننګرهار او په ټوله کې د هېواد ختیځ زون د پولیو له لوړ ګواښ سره مخ دی ځکه مخکې هم هلته د پولیو ویروس محیطي پېښې موجودې وې او په ناپاکو اوبو او ککړ چاپېریال کې د پولیو ویروس شتون تثبیت شوی و.
په خبر پاڼه کې راغلي، په بهسود ولسوالۍ کې- چې د پولیو دا پېښه په کې ثبت شوې- د ننګرهار د نورو ولسوالیو په څېر یې د اوسېدونکو حفظ الصحه یا روغتیا ساتنه کمزورې ده.
د پولیو د له منځه وړلو ملي عملیاتي بېړني مرکز مشر ډاکټر نیک ولي شاه مؤمن وايي، د پولیو په ناروغي اخته شوي دغه ماشوم د پولیو واکسین کمپاین په ټولو پړاونو کې واکسین شوی هم و، خو له دې سربېره په دې ناروغي اخته شو.
نوموړي وویل، له دې ښکاري چې یوازې د واکسین په وسیله د پولیو ناروغۍ مخنیوی نه شي کېدای، بلکې اړتیا ده چې د واکسین تر څنګ پر نورو لارو چارو هم کار وشي څو ماشومان د دغه خطرناک ویروس له ګواښ څخه وژغورل شي.
هغه زیاته کړه: «د واکسین تر څنګ باید د ماشومانو د معافیت پر پیاوړتیا کار وشي؛ د حفظ الصحې رعایتولو لپاره باید امکانات برابر شي، ځکه ډېرې کورنۍ اوبو ته لاسرسی نه لري؛ د خوارځواکۍ مخنیوی باید وشي چې د غربت او نړیوالو بندیزونو له امله ورځ تر بلې بد حالت ته روانه ده؛ دغه راز په لرو سیمو کې لومړنیو روغتیايي خدماتو ته د لاسرسي کچه ټیټه ده، کله چې خلک لومړنیو روغتیايي خدماتو ته لاسرسی نه لري نو څنګه د پولیو ناروغۍ مخنیوی کولای شو؟»
نوموړي د دې تر څنګ د خلکو د پوهاوي کچې پر لوړولو هم ټینګار کوي او وايي دا چاره هم د پولیو په مخنیوي کې اغېزناک رول لري.
د یادونې ده چې په روان کال کې له دې مخکې د پولیو درې نورې پېښې د ننګرهار په بټي کوټ، کوټ او نازیانو ولسوالیو کې ثبت شوې چې څلورمه هغه یې اوس په بهسود ولسوالۍ کې ثبت شوه.
د پولیو د له منځه وړلو پروګرام جدي هڅې کوي چې په ختیځ زون کې د نورو چارو تر څنګ د نظارت کچه لوړه کړي او ټول ماشومان د پولیو واکسین تر پوښښ لاندې راولي څو د پولیو ویروس د پایښت لپاره هیڅ تشه پاتې نه شي او په راتلونکې کې نور ماشومان په دې ناروغي اخته نه شي.
په پام کې ده چې په دې حوزه کې د سرتاسري او فرعي کمپاینونو تر څنګ نور اختصاصي او یا د پولیو د پېښو ځوابیه کمپاینونه هم پلي شي څو ژر تر ژره د دغه ویروس د لازیات خپرېدو مخه ونیول شي.